Festival de Cans en Bruxelas todo un exito de publico e critica

Cine
O «agroglamur» asalta Europa
A asociación cultural Couto Mixto de Bruxelas leva á capital belga as curtas galegas gañadoras do Festival de Cans 2008
Autor: Juan Oliver Correspondente
La Voz de Galicia 18/10/2008

O festival de curtas de cine que se celebra cada mes de maio desde o ano 2004 na aldea porriñesa de Cans -450 habitantes- xa tiña gañanda unha merecida sona. Primeiro, pola súa enxebre orixinalidade. Segundo, pola súa defensa da cultura galega e pola aposta polos creadores noveis. E terceiro, por terse atrevido a contrapoñer sen medo o agroglamur galego, cos seus chimpíns, motocarros, e tractores, ao endiosado universo estelar da jet set da industria do cine, que polas mesmas datas se da cita sobre unha alfombra vermella orillada de flashes e limusinas na localidade francesa de Cannes.
Ata o de agora, sen embargo, o éxito do Festival de Cans apenas tiña traspasado as fronteiras de Galicia. Pero o pasado xoves deu o salto a Europa coa proxección das curtas gañadoras da edición do 2008 no emblemático Teatro Vendôme de Bruxelas, no barrio de Ixelles, o máis activo da vanguardia cultural da capital belga.
Couto Mixto
A iniciativa partíu da asociación Couto Mixto de Bruxelas, fundada hai un ano por unha treintena de galegos expatriados na cidade, e que pretende convertirse en emisora cultural da galeguidade, achegando as manifestacións da cultura galega aos centros de decisión en Europa.
«Quixemos reunir á xente que ten capacidade multiplicadora e mostrarlles á existencia dunha industria audiovisual galega, probablemente moi alonxada da idea que teñen de Galicia», asegurou Serafín Pazos, un dos socios de Couto Mixto. Nos vindeiros meses, a asociación pretende tambén celebrar unha exposición de banda deseñada e un festival de música electrónica.
No que se refire ás curtas, a sá de proxección do Vendôme quedouse pequena para acoller a un público multinacional que puido ver dun tirón as curtas do palmarés do 2008: Sálvame, de Javier Veiga; 1977, de Peque Varela; A revolta dos mouses, de David Gen; Calamar, de The Homens, e España a las ocho, de Elodio y los seres queridos. Además, se proyectaron Agroglamour y Máis Cans que nunca, de Luis Otero, documentais ao estilo cómo se fixo sobre as circunstancias, obxectivos, preparativos e aspiracións do certame.
Festival itinerante
«Queremos facer un festival itinerante, porque non somos un certame internacional, pero si queremos internacionalizar os nosos contidos», suliña Alfonso Pato, o director. O Festival de Cans xa ten viaxado a Madrid e a Lisboa, e, segundo afirma Pato, prepara celebrar actos similares ao de Bruxelas en Barcelona, Berlín, A Haia e Santiago de Chile.

PD: Grazas a todos por vir, animanos a seguir facendo cousas e lembrade que calquera galego ou amigo de Galicia é benvido no Couto Mixto Bruxelas.

De Cans a Bruxelas:cita coas mellores curtametraxes galegas. 16 Outubro 7pm Cinema Vendome

O Cinema Vêndome acolle o Festival de Cans, unha mirada sen complexos á realidade galega

O xoves 16 de outubro ás 19.00, o Festival de Cans arranca en Bruxelas, no cine Vêndome. As curtametraxes que se poderán ver dan unha boa idea da calidade e diversidade do panorama cinematográfico galego actual: o máis innovador do cine fantástico, a comedia, o musical, o drama e o cine de animación compartirá programa xunto coas curtametraxes galegas máis inclasificables e descaradas.
No Festival de Cans proxéctanse curtametraxes galegas, pero Cans é moito máis ca un festival de curtas, é unha mirada sen complexos á realidade galega.
Este ano o festival dá o salto a Bruxelas. Pero cada maio, ao mesmo tempo que o Festival de Cannes reúne na Costa Azul ao máis glamouroso da cinematografía mundial, as mellores curtametraxes galegas proxéctanse nos alpendres da aldea galega de Cans (450 veciños). Non se ven limousines por Cans, pero si chimpíns, o transporte oficial do festival. Para a ocasión, estes pequenos tractores deixan de carrexar herba, abono ou millo para encargarse de mover a público e convidados dunha sala a outra conducidos polos veciños de Cans.

O festival, que fai xa 5 anos, é organizado pola Asociación Cultural Arela, integrada por xente nova do Porriño e Mos, baixo a coordinación do guionista Alfonso Pato.

O nome e lugar do festival non son unha coincidencia xa que o festival ten coma obxectivo valorizar a producción audiovisual galega celebrando un festival que reinterpreta os fastos dun festival coma o de Cannes cans dunha maneira moi á galega. Podemos dicir que neste festival importa o continente impora tanto coma o contido. Por iso se proxectara tamen un making-off do festival.
En colaboración con Arela, a asociación Couto Mixto Bruxelas ASBL, formada por expats galegos en Bruxelas, quixo achegar este festival á capital europea, como parte do seu programa de difusión da realidade cultural galega no exterior.
As cita de Bruxelas contera os filmes e videos premiados na edicion de 2008 do Festival.
- Agroglamour, documental sobre o festival. 20 min. aprox.
- Sálvame, de Javier Veiga. Premios do público e do xurado de ficción. 20 min aprox.
- 1977, de Peque Varela. Premio do xurado de animación. 8 min aprox.
- A revolta dos mouses, de David Gen. Premio do público de animación. 22 min aprox.
- Videoclips: 'Calamar' de The Homens' e 'España a las ocho' de Elodio y los seres queridos. Total: 10 min. aprox.
- Máis Cans que nunca, movie machine (fotomontaxe animada) de Luis Otero. 8 min aprox.
O evento durara duas horas e todalas cintas estan subtituladas en ingles.

Cinema Vendôme Bruxelles-Brussel Waversesteenweg, 18 Chée de Wavre, 1050 BXL